काठमाडौं , १० माघ । नेकपा (एमाले) का अध्यक्ष केपी शर्मा ओलीले सरकारले आफूलाई विमानस्थलमा अपमान गरेको आरोप लगाएका छन्। शुक्रवार गृहजिल्ला झापाबाट काठमाडौं फर्कने क्रममा विमानस्थलमा आफूलाई सुन तस्कर जस्तो व्यवहार गरिएको उनले बताए।
शनिबार पार्टी कार्यालय च्यासलमा आयोजित कार्यक्रममा ओलीले भने, “अस्ती म यताबाट झापा जाँदा एयरपोर्टमा राम्रै व्यवहार भएको थियो। हिजो फर्किंदा के के न सुन तस्कर जस्तो गरेर चेकिङ भयो। हैरान परें। नचिनेको ठाउँमा परेपछि नेपालीहरुलाई हेपिएको अनुभव हुन्छ। हिजो एयरपोर्टमा त्यस्तै व्यवहार भयो। त्यसको कारण माथिबाट आदेश आएको भनिएको छ।”
अध्यक्ष ओलीले देशको सम्मानका लागि आफूले यस विषयलाई ठूलो रूपमा नलिएको भए पनि सरकारको दृष्टिकोण अस्वीकार्य रहेको बताए। उनले थपे, “सरकार नेताहरूमाथि अपमान गर्ने हो। यस्तो व्यवहार एक सभ्य समाजको लागि उपयुक्त छैन। जिम्मेवार सरकार नभएको, अराजनीतिक र असभ्य सरकारको काम देखियो। यी सबै कुरा फेरि सभ्य र सुसंस्कृत समाजमा ल्याउनु हाम्रो जिम्मेवारी हो। चुनावको नतिजाले पनि यसबारे स्पष्ट संकेत दिनेछ।”
ओलीले एमालेले देशलाई सही बाटोमा अघि बढाउन सरकार बनाउनुको विकल्प नभएको पनि बताए। उनको यो टिप्पणी आगामी निर्वाचन र पार्टी रणनीतिसँग जोडिएको रूपमा व्याख्या गरिएको छ।
यसअघि ओलीका विमानस्थल अनुभवले सरकार र राजनीतिक नेतृत्वबीचको सम्बन्धमा बढ्दो तनावलाई उजागर गरेको छ। उनका समर्थकहरूले पनि यस विषयमा चिन्ता व्यक्त गरेका छन्, र पार्टी भित्र आगामी चुनावी अभियानका लागि यसले थप गतिशीलता ल्याउने अनुमान गरिएको छ।
प्रतिक्रिया दिनुहोस् !
